Ögmundur vill ekki gera mál flugumannsins að utanríkismáli

Ögmundur Jónasson er ekki þeirrar skoðunnar að taka þurfi mál flugumannsins Mark Kennedys upp gagnvart breskum yfirvöldum. Í skýrslu ríkislögreglustjóra segir að ekkert bendi til þess að íslensk lögregluyfirvöld hafi vitað af því að Mark Kennedy hefði á sínum tíma verið flugumaður á vegum bresku lögreglunnar en hann tók þátt í mótmælaaðgerðum Saving Iceland við Kárahnjúka á sínum tíma.

Birgitta Jónsdóttir þingmaður Hreyfingarinnar sagði á þingi í dag að í skýrslunni hafi ekkert svar fengist við spurningunni, heldur beiti lögregluyfirvöld því fyrir sig að þeim sé óheimilt að gefa upp slíkar trúnaðarupplýsingar.

Birgitta spurði því hvort ráðherra teldi koma til greina að kalla breska sendiherrann hér á landi á teppið til þess að skera úr um hvort íslenska lögreglan hafi vitað af flugumanninum.

Ögmundur taldi slíkt ekki koma til greina. Hann benti ennfremur á að evrópsk lögregluyfirvöld hafi flugumenn iðullega á sínum snærum, til dæmis í rannsóknum á fíkniefnabrotum. Ráðherrann vill hins vegar beita sér fyrir því skorður verði reistar við því að flugumenn geti starfað innan pólitískra hópa, eins og var í þessu tilviki.