Móðirin ákærð fyrir manndráp af ásetningi

Þorbjörn Þórðarson skrifar 1. nóvember 2011 18:45

Ung kona sem skildi nýfætt barn sitt eftir í ruslagámi við Hótel Frón hefur verið ákærð fyrir manndráp af ásetningi og til vara fyrir að deyða barn sitt í fæðingu. Hún var metin sakhæf og á yfir höfði sér allt að sextán ára fangelsi. Hún er talin hafa borið ein ábyrgð á dauða barnsins.

Það var laugardaginn 2. júlí í sumar sem konan, sem er frá Litháen og var starfsmaður hótelsins, skildi barnið eftir í ruslageymslu við Hótel Frón.

Niðurstöður krufningar leiddu í ljós að barnið var á lífi og heilbrigt þegar það fæddist en konan er talin bera ábyrgð á andláti þess.

Ákæran var send Héraðsdómi Reykjavíkur í gær. Konan er ákærð fyrir 211. gr. almennra hegningarlaga, þ.e fyrir manndráp af ásetningi og gæti hún því átt yfir höfði sér sextán ára fangelsi. Til vara er ákært fyrir 212. gr. hegningarlaga, þ.e fyrir að hafa deytt barn sitt í fæðingu. Skilyrði 212. gr. er að móðir hafi deytt barn sitt vegna „neyðar, ótta um hneisu eða sökum veiklaðs eða ruglaðs hugarástands" og við því liggur vægari refsing, eða allt að sex ára fangelsi. Það veltur því á sönnunarfærslu ákæruvaldsins hversu þungan dóm konan fær, verði hún fundin sek í málinu.

Konan er ein ákærð í málinu og þar með ein talin hafa borið ábyrgð á dauða barnsins. Fyrrverandi sambýlismaður konunnar, sem einnig er frá Litháen og feðraði barnið án þess að hafa vitað af því, er ekki ákærður og hefur fengið tilkynningu þess efnis að hann sé ekki grunaður í málinu.

Ákæran verður þingfest innan tveggja vikna. Konan var metin sakhæf af geðlækni en Daníel Pálmason, verjandi konunnar, sagði í samtali við fréttastofu í dag að hann hygðist leggja fram beiðni um annað sakhæfismat við þingfestingu ákærunnar. Konan dvelst hér á landi og er í farbanni en úrskurður Héraðsdóms þess efnis var ekki kærður til Hæstaréttar. thorbjorn@stod2.is

Tengdar fréttir

Barnið með áverka á andliti eftir eggvopn þegar það fannst

Móðir sem skildi nýfætt sveinbarn sitt eftir í ruslageymslu við Hótel Frón á laugardag er grunuð um að hafa veitt því áverka í andliti með eggvopni áður en hún kom því fyrir. Bráðabirgðaniðurstöður krufningar leiddu í ljós að barnið var á lífi og heilbrigt þegar það fæddist en konan er talin bera ábyrgð á andláti þess.

7. júlí 2011 18:45

Líkfundur við Hótel Frón: Vissu ekki að konan væri ólétt

Konan sem grunuð er um að hafa skilið nýfætt barn sitt eftir í ruslagámi við hótel í Reykjavík í gærmorgun er 22 ára gömul og er frá Litháen. Kærasti hennar er enn í haldi.

3. júlí 2011 11:55

Barnslát: Móðirin laus úr gæsluvarðhaldi

Litháíska konan, sem ól barn við Hótel Frón um helgina en skildi við það í ruslagámi stuttu seinna, hefur verið látin laus úr gæsluvarðhaldi. Þetta staðfestir verjandi konunnar í samtali við fréttastofu. Héraðsdómur Reykjavíkur úrskurðaði konuna í gæsluvarðhald á sunnudaginn, eftir að barnið fannst látið í ruslagámnum. Hæstiréttur felldi úrskurðinn hins vegar úr gildi.

7. júlí 2011 13:49

Harmleikur á Laugavegi: Munu krefjast farbanns yfir móðurinni

Krafist verður farbanns yfir Litháísku konunni, sem er talin hafa skilið nýfætt barn sitt eftir í ruslagámi við Hótel Frón í Reykjavík á laugardagsmorgun, í héraðsdómi í dag.

7. júlí 2011 14:51

Barnið átti grunlausan blóðföður á Íslandi

Niðurstöður DNA rannsóknar hafa leitt í ljós að sveinbarn sem litháísk móðir skildi eftir nýfætt og andvana í ruslageymslu við Hótel Frón í júlí í sumar átti blóðföður hér á landi, samkvæmt upplýsingum Fréttablaðsins.

24. ágúst 2011 07:00

Tveggja vikna gæsluvarðhald og geðheilbrigði rannsakað

Litháísk kona á tuttugasta og öðru aldursári, sem er talin hafa fætt barn í gær sem fannst látið í ruslagámi við Hótel Frón þar sem hún vann, var úrskurðuð í tveggja vikna gæsluvarðhald í dag en henni var jafnframt gert að gangast undir rannsókn á geðheilbrigði. Kærasti konunnar er laus úr haldi lögreglu.

3. júlí 2011 15:38