Skorið á tjald aðgerðarsinna

Mótmælendur staðhæfa að lögreglan hafi farið offorsi í aðgerðum gegn mótmælendum á Austurvelli í morgun. Þetta kemur fram á vefsíðunni Gagnauga í dag. Mótmælafundurinn bar heitið Occupy Reykjavík og er í takt við svipaðar hreyfingar sem sprottið hafa upp í Bandaríkjunum og víðar.

Mótmælin hófust í gærkvöldi og voru friðsamleg. Samkvæmt mótmælendum voru inngrip lögreglunnar engin í gær. Mótmælendur höfðu kynnt sér reglur um tjöldun á almenningssvæðum en samkvæmt þeim er leyfilegt að tjalda í sólarhring án afskipta.

Fram kemur á Gagnauga að mótmælendur hafi ætlað að ræða við garðyrkjustjóra Reykjavíkurborgar um að fá leyfi fyrir tjaldbúðunum.

Samkvæmt mótmælendunum réðst lögreglan á tjaldbúðirnar í morgun. Þeir hafi skipað mótmælendunum að yfirgefa tjöldin. Þegar aðgerðarsinnarnir báðu um frest til að taka saman búnað sinn skar lögreglan á tjaldið með hnífi.

Samkvæmt frásögn mótmælenda handtók lögreglan einn mann stuttu eftir að tjaldið var rifið niður. Þeir segja að lögreglumaður hefði otað hnífi að mótmælandanum og aðrir mótmælendur sem voru á staðnum hafi beðið lögreglumanninn um að fjarlægja hnífinn. Fram kemur að lögreglan hafi síðan fleygt því sem eftir var af tjaldinu og öðrum búnaði upp í bíl garðyrkjustjóra.

Mótmælendur sem voru á staðnum segja að lögreglumenn hafi beitt miklu harðræði í aðgerðunum og að enginn af aðgerðarsinnum á Austurvelli hafi streist á móti.

Mótmælendur segja að níu lögreglumenn hafi verið á staðnum ásamt starfsfólki garðyrkjustjóra Reykjavíkurborgar.