Obama skrifar í Fréttablaðið: Samvinna sem við þurfum á að halda

„Þeir sem réðust á okkur 11. september vildu reka fleyg milli Bandaríkjanna og umheimsins. Þeim mistókst".

Þannig skrifar Barack Obama, forseti Bandaríkjanna, í grein sem birtist í Fréttablaðinu í dag, og ber heitið: „Samvinnan sem við þurfum á að halda."

Greinin er rituð í tilefni þess að tíu ár eru liðin frá hryðjuverkaárásunum á tvíburaturnanna þann 11. september 2001. Greinin birtist í helstu blöðum Evrópu.

Forsetinn segir að sem hluti af breiðri samfylkingu, „ hröktum við al-Kaída frá þjálfunarbúðum sínum í Afganistan, steyptum talibönum af stóli og gáfum afgönsku þjóðinni tækifæri til að lifa laus við ógnarstjórn. En árin sem á eftir fylgdu voru erfið og sá andi hnattrænnar samvinnu sem við fundum eftir 11.9. dvínaði."

Hann segir að sem forseti hafi hann unnið að því að endurnýja samvinnu allra ríkja sem nauðsynleg er til að mæta þeim víðtæku og krefjandi viðfangsefnum sem þjóðirnar standi frammi fyrir.

„Á þessu nýja skeiði skuldbindinga höfum við myndað bandalög við ríki og þjóðir á grunni gagnkvæmra hagsmuna og gagnkvæmrar virðingar," skrifar forsetinn í grein sinni.

Obama segir svo að um allan heim munu Bandaríkjamenn halda áfram að koma á friði, efla þróun sem lyftir fólki upp úr fátækt og stuðla að fæðuöryggi, heilbrigði og góðum stjórnarháttum sem leysa úr læðingi möguleika borgaranna og þjóðfélaganna.

Hægt er að lesa grein Obama í heild sinni með því að smella á hlekkinn hér fyrir neðan.