Árvakur uppfyllir ekki kröfur banka

Árvakur, útgáfufélag Morgunblaðsins, uppfyllir ekki lengur skilyrði í lánasamningi við Íslandsbanka sem kveður á um lágmarks eigið fé og rekstrarhagnað. Félagið á í viðræðum við bankann um fjármögnun og óvíst er hver niðurstaðan verður.

Árvakur, útgáfufélag Morgunblaðsins, tapaði 330 milljónum króna í fyrra samkvæmt ársreikningi en eignir félagsins voru um 2,9 milljarðar króna í lok árs og eiginfjárhlutfallið 23,5 prósent.

Í yfirliti yfir langtímaskuldir Árvakurs kemur fram að skuld félagsins við innlenda banka, sem er Íslandsbanki, hafi numið 1,7 milljörðum króna í árslok 2010.

Í gildandi samningum Árvakurs við Íslandsbanka þarf hagnaður fyrir skatta og afskriftir að duga fyrir afborgunum lána, en samkvæmt áætlun í lánasamningi þarf Árvakur að greiða a.m.k níutíu milljónir króna á ári í afborganir næstu fimm árin.

Sérstaka athygli vekur í skýringum með ársreikningnum að forráðamenn Árvakurs hafi átt í viðræðum við Íslandsbanka þar sem Árvakur uppfylli ekki lengur skilyrði í lánasamningi sem kveður á um eiginfjár- og rekstrarhagnaðarhlutfall. Þ.e félagið uppfyllir ekki lengur kröfu bankans um hagnað af rekstri og lágmarks eigið fé.

Í skýringum segir að viðræðurnar við bankann gangi út á að endursemja um fjármögnun lána, en ekki sé fyrirséð hver niðurstaðan verður. Lánið við bankann hafi verið í frystingu frá því samningaviðræður hófust. Þá segir að „rekstrarhæfi Árvakurs ráðist af niðurstöðu viðræðna við Íslandsbanka." En í sumum tilvikum getur lánveitandi gjaldfellt lán brjóti lántakandi samninga af þessu tagi.

Óskar Magnússon, útgefandi Árvakurs, sagði í samtali við fréttastofu að framtíð Árvakurs væru ekki í óvissu þrátt fyrir að þessi mál gagnvart bankanum væru enn óleyst. Hann sagði besta mælikvarðann á rekstur Árvakurs vera þann viðsnúning sem hefði orðið á undanförnum tveimur árum en fyrirtækið hefði farið úr tæplega 500 milljóna króna rekstrartapi á árinu 2009 í að hagnaður fyrir skatta, fjármagnsliði og afskriftir á miðju þessu ári hefði verið um þrjátíu milljónir króna.