Langt í sameiginlega hagstjórn ESB

Yfirlýsingar leiðtoga öflugustu ríkjanna á evrusvæðinu um aukna sameiginlega hagstjórn ríkja á svæðinu virtust ekki róa fjárfesta því hlutabréfavísitölur féllu í dag. Sérfræðingar segja mjög langt í að sameiginleg hagstjórn á evrusvæðinu verði að veruleika.

Angela Merkel kanslari Þýskalands og Nicolas Sarkozy forseti Frakklands lýstu því yfir á sameiginlegum blaðamannafundi í gær að stefnt yrði að aukinni sameiginlegri hagstjórn ríkjanna á evrusvæðinu. Sarkozy talaði á fundinum um sérstaka efnahagsstjórn fyrir Evrópu, sem myndi hittast a.m.k tvisvar á ári, undir forsæti Herman Vom Rompuy, forseta Evrópusambandsins.

Þá kölluðu þau Merkel og Sarkozy eftir því að ríkin á evrusvæðinu myndu binda ákvæði um jöfnuð í ríkisfjármálum í stjórnarskrár sínar.

Helstu hlutabréfavísitölur í Evrópu lækkuðu í morgun, og virtust yfirlýsingar leiðtoganna ekki hafa náð því markmiði sínu að róa fjárfesta.

Sérfræðingar á mörkuðum í Evrópu segja að enn sé langt í að sameiginleg hagstjórn verði að veruleika og því hafi yfirlýsingar í þá veru takmarkaða þýðingu enn um sinn.

Á fundinum í gær hafnaði Angela Merkel útgáfu sameiginlegra skuldabréfa fyrir ríkin á evrusvæðinu og sagði að það yrði aðeins að veruleika ef auknum efnahagslegum samruna yrði náð. Og svo virðist sem fjárfestar hafi búist við einhverju meiru frá leiðtogunum.