Nýjar þjónustuíbúðir aldraðra rísa við Sléttuveg

Borgarstjórinn í Reykjavík, Jón Gnarr, og Guðmundur Hallvarðsson, stjórnarformaður Sjómannadagsráðs, hafa undirritað þjónustusamning um rekstur þjónustukjarna fyrir aldraða í Reykjavík.



Samkvæmt samningnum mun Hrafnista reisa þjónustukjarna og 100 þjónustu- og öryggisíbúðir við Sléttuveg, þar sem boðið verður upp á alhliða þjónustu við aldraða. Reykjavíkurborg mun leigja þjónustukjarnann undir þjónustu borgarinnar við aldraða, en auk þess mun borgin hafa 20 þjónustuíbúðir til ráðstöfunar sem verða leigðar út á vegum velferðarsviðs borgarinnar.

Gert er ráð fyrir að bygging hefjist á næsta ári og að þjónusta verði veitt frá árinu 2013.