Veigar Páll fer til Vålerenga eftir allt saman

Norskir fjölmiðlar telja sig hafa sterkar heimildir fyrir því að Veigar Páll Gunnarsson sé á förum til Vålerenga í Osló en hann virtist vera búinn að semja við Noregsmeistaralið Rosenborg í Þrándheimi fyrir nokkrum dögum. Veigar er ein verðmætasta söluvara Stabæk sem er í miklum fjárhagsörðugleikum.

Arnór Guðjohnsen umboðsmaður Veigars Páls sagði viðtali við Aftenposten í síðustu viku að hann væri búinn að komast að samkomulagi við Rosenborg. En ekkert varð af þeim vistaskiptum þar sem að liðin náðu ekki samkomulagi um kaupverðið. Talið er að verðmiðinn á Veigari sé á bilinu 60-100 milljónir kr.

Veigar ræddi við forráðamenn Vålerenga í síðustu viku einnig og sagði framherjinn við Aftenposten að hann hafi neitað tilboði félagsins. Veigar, sem er 31 árs gamall, hefur nú skipt um skoðun og virðist ætla að ganga í raðir Oslóarliðsins sem er ekki langt frá Bærum þar sem Veigar Páll hefur búið undanfarin misseri.

Í gær fór Veigar í læknisskoðun og samkvæmt heimildum norskra fjölmiðla skrifaði hann undir samning sem gildir út tímabilið 2014.