Owen tryggði Manchester United sigur á Barcelona

Michael Owen kom inn á sem varamaður og tryggði Manchester United 2-1 sigur á Evrópumeisturum Barcelona í æfingaleik liðanna í Washington í Bandaríkjunum í nótt.

United hefndi því pínulítið fyrir tapið í úrslitaleik Meistaradeildarinnar í vor en það vantaði reyndar frábæra leikmenn í lið Barca eins og þá Lionel Messi og Xavi. Báðir þjálfarar leyfðu mörgum leikmönnum að spreyta sig í leiknum sem var hin besta skemmtun.

Nani kom United í 1-0 á 22. mínútu eftir að hafa fengið stungusendingu frá Danny Welbeck en nýjasta stjarna Barcelona-liðsins, Thiago Alcántara, jafnaði metin með stórglæsilegu skoti á 70. mínútu. Sigurmark Owen kom aðeins sex mínútum síðar eftir sendingu frá Tom Cleverley.

Manchester United vann alla fimm leiki sína í Bandaríkjaferðinni en það voru leikir á móti: New England Revolution (4-1), Seattle Sounders (7-0), Chicago Fire (3-1) og MLS All-Stars (4-0). Michael Owen skoraði 3 mörk í ferðinni en markatala United-liðsins var 20-2.