Segir sveitarfélög fjármagna kjarasamninga með uppsögnum

„Sveitarstjórnarmenn hafa sagt við mig eftir þessa samninga, sem við höfum auðvitað orðið að gera því getum illa skorið okkur frá ríki og almennum markaði, er á þessa leið - þetta fjármögnum við með því að segja upp fólki,“ segir Halldór Halldórsson, formaður Sambands íslenskra sveitarfélaga.

Sigurjón M. Egilsson ræddi við Halldór og Gylfi Arnbjörnsson, forseti ASÍ, í útvarpsþætti sínum á Bylgjunni í dag um kjarasamninga og horfur í efnahagsmálum. Halldór sagðist alltaf hafa haft miklar efasemdir um kjarasamningana og aukin útgjöld fyrir sveitarfélögin. Hann hafi ekki haft trú á efnahagsforsendum sem höfð voru til hliðsjónar þegar samningarnir voru gerðir. Það sé að koma á daginn núna að samningarnir muni reynast sveitarfélögunum erfiðir.

Eftir langa samningarimmu náðust kjarasamningar á almennum vinnumarkaði í byrjun maí. Þá spáðu sérfræðingar að verðbólga myndi aukast.

Gylfi sagði ekki við kjarasamningana að sakast. Réttast væri að beina athyglinni að Seðlabankanum og efnahagsstefnu ríkisstjórnarinnar. „Auðvitað vissum við að 4% launahækkun myndi hafa áhrif á verðlag en laun í landinu eru ekki nema 35% af verðlagningu. Restin er gengi og annar kostnaður. Þannig að það er ekki hægt að skýra 5% verðbólgu með 4% launahækkun. Það gengur bara ekki upp.“

Halldór tók undir með Gylfa og sagði verðbólguna sem slíka ekki skýrða með launahækkunum. Um leið þyrfti að hafa í huga að kaupmátturinn skipti mestu og að fólk fái sem mest fyrir launin.

Gylfi benti á að krónan hefði fallið og haldið áfram að veikjast undanfarna mánuði.  „Veiking krónunnar endurspeglar mat bæði markaðarins og umhverfisins á efnahagsþróuninni. Við erum með krónuna í höftum og þrátt fyrir það veikist hún." Þá sagði Gylfi Íslendinga þurfa að hugsa lengra og fá annan gjaldmiðil í stað krónunnar sem reglulega hafi kaupið og eiginirnar af fólki. Íslendingar þurfi einfaldlega stærri gjaldmiðil sem þoli meira álag.