Segir falsmynd dregna upp af stöðu ríkissjóðs

„Þetta slær mig illa. Það eru nokkrar vikur síðan ríkisstjórnin gaf út þá yfirlýsingu að vegna góðrar stöðu ríkissjóðs væri hann í færum til að stórhækka bætur og styðja við gerð kjarasamninga með stórauknum útgjöldum," segir Bjarni Benediktsson, formaður Sjálfstæðisflokksins um nýjustu fréttir af ríkisreikningi fyrir síðasta ár. Fréttablaðið greindi frá því að halli á ríkisrekstri hafi numið 123 milljörðum króna. Það er 41 milljarði meira en gert var ráð fyrir.

„Það er mikil falsmynd sem fjármálaráðherrann og ríkisstjórnin dregur iðulega upp af stöðu ríkissjóðs og efnahagslífsins í landinu. Það er kominn tími til að horfast í augu við það að það gengur ekki að fara leið skattahækkana, Menn verða að taka ábyrgð líka á þeim stórkostlegu fjárhæðum sem ríkið hefur verið að verja til bjargar einstökum fjármálastofnununm og færa fyrir því rök að það sé skynsamlegt. En ekki í sífellu tala um hinn mikla árangur þegar hallinn er jafn gríðarlegur og raun ber vitni," segir Bjarni.

Bjarni segir að fjölmargar fjármálastofnanir þurfi að skoða í samhengi við rekstur ríkisins. „Íbúðalánasjóður er nefndur til sögunnar vegna ársins 2010. Þingið kallaði eftir mun ítarlegri upplýsingum og greinargerð á því hvað þyrfti í raun og veru að koma Íbúðalánasjóði á réttan kjöl. Er búið að láta Íbúðalánasjóði í té það sem hann þarf eða eigum við eftir að þurfa að setja enn meira þegar fram líða stundir? Mig grunar að það vanti enn uppá. Hvert verður tap ríkissjóðs vegna framlagsins til Byrs og til Sparisjóðs Keflavíkur?" spyr Bjarni og segir að þarna séu tilfelli sem verði að skoða.

Hann segir það þó vera enn meira áhyggjuefni hve rekstur ríkisins sé miklu seinni að taka við sér en að hafi verið stefnt. Íbúðalánasjóði verði ekki einum kennt um, enda sé halli ríkissjóðs um 90 milljarðar að honum undanskildum. „Ég er ekki að segja að það hefði verið hægt að reka ríkissjóð í fyrra, árið 2010 hallalaust. Ég er einfaldlega að segja að umsvifin í þjóðfélaginu þurfa að vaxa þannig að tekjur ríkisins aukist," segir Bjarni