Ögmundur áminnir Jón Gnarr

Innanríkisráðuneytið hefur sent skrifstofu borgarstjóra Reykjavíkurborgar bréf þar sem skorað er á Reykjavíkurborg að senda þriggja ára áætlun til ráðuneytisins án tafa. Í bréfinu er hótað dagsektum og stöðvun greiðsla úr jöfnunarsjóði sveitarfélaga ef áætlunin verður ekki birt.

Samkvæmt sveitastjórnarlögum á sveitarfélag að skila inn þriggja mánaða áætlun fyrir lok febrúarmánaðar. Í slíkri áætlun er fjallað um rekstur, framkvæmdir og fjármál sveitarfélagsins til þriggja ára. Reykjavíkurborg hefur ekki birt sína áætlun og svarar borgin því til að tafirnar séu vegna flutninga á málefnum fatlaðra frá ríki til sveitarfélaga.

Þá greindi Vísir frá því í morgun að Kauphöll Íslands hefði áminnt og sektað Reykjavíkurborg og fjögur önnur sveitarfélög fyrir að skila ekki ársreikningum sínum til Kauphallarinnar á réttum tíma. Sveitarfélögin eru, auk Reykjavikurborgar, Sandgerðisbær, Vestmannaeyjabær, Norðurþing og Langanesbyggð.

Samkvæmt sveitastjórnarlögum á að skila inn ársreikningum fyrir lok aprílmánaðar. Fjögur fyrrgreindra sveitarfélaga skiluðu ársreikningunum inn um miðjan maí, en Vestmannaeyjabær skilaði þeim inn seinni hlutann í júní.