Veigar Páll er enn leikmaður Stabæk segir talsmaður liðsins

Inge André Olsen, yfirmaður íþróttamála hjá norska fótboltaliðinu Stabæk, segir í viðtali við NRK að ekki sé búið að ganga frá sölunni á Veigari Páli Gunnarssyni til meistaraliðs Rosenborg í Þrándheimi. Olsen segir ennfremur að töluvert beri í milli í viðræðunum og það sé alls ekki búið að ganga frá samningum við Veigar Pál hjá Rosenborg. 

„Við höfum fengið símtal frá Rosenborg þar sem þeir neita því að þeir sé búnir að komast að samkomulagi við leikmanninn. Það er langur vegur frá því,“ segir Olsen við NRK.

„Samningaviðræður okkar við Rosenborg um Veigar Pál hafa staðið yfir í langan tíma og það sem hefur gerst í þessu máli á undanförnum dögum er án okkar vitundar. Mér finnst það skrýtið að umboðsmaður Veigars Páls skuli greina frá því að málið sé í höfn. Veigar á eitt og hálft ár eftir af samningi og eins og staðan er núna þá er hann leikmaður Stabæk,“ bætti Olsen við en hann staðfestir að Vålerenga hafi einnig áhuga á að fá Veigar í sínar raðir.

„Ég get staðfest að Vålerenga hefur áhuga, en ég get ekki greint frá því hvort formlegt tilboð hafi borist frá félaginu,“ segir Olsen.