Björn Bergmann: Aldrei verið jafnhræddur

Norski fjölmiðillinn Nettavisen greinir í dag frá því að Björn Bergmann Sigurðarson hafi skotið liðsfélaga sinn hjá Lilleström í afturendann með loftbyssu árið 2010. Liðsfélaginn, Maríus Johnsen, fékk uppreisn æru þegar hann hræddi líftóruna úr liðsfélaga sínum.

Björn Bergmann er í viðtali á heimasíðu Nettavisen þar sem hann greinir frá því hvað hafi gerst. Að lokinni æfingu hjá Lilliström hafi hann náði í glænýja loftbyssu sem hann geymdi í bíl sínum. Hann sá Maríus Johnsen á vappi í um 100 metra fjarlægð og ákvað að fíflast í honum.

Björn Bergmann stillti miðið og smellti af. Kúlann fór beint í afturenda á Johnsen við mikla hrifningu liðsfélaga þeirra hjá Lilleström.

„Maríus veiðir töluvert og ég ákvað að það væri fínt að grínast aðeins í honum. Færið var langt en ég hitti beint í rassinn á honum," sagði Björn Bergmann.

En þar með er sagan ekki öll. Nokkru síðar mættu tveir lögreglumenn á svæðið og settu Björn Bergmann í handjárn.

„Það var rosalegt. Lögreglumennirnir komu inn í búningsklefann og sögðu mér að ég væri handtekinn. Ég varð blár í framan. Þeir færðu mig í járn og ég hef aldrei verið jafnhræddur á ævi minni," sagði Björn Bergmann.

Skömmu síðar skelltu lögreglumennirnir upp úr og Björn Bergmann áttaði sig á því hvað um var að vera. Lögreglumennirnir voru kunningjar Johnsen. Hann hafði fengið þá til þess að aðstoða sig við að hefna fyrir loftbyssuskotið.