Tryggvi: Verðskulduð þrjú stig

Tryggvi Guðmundsson var ánægður með stigin þrjú sem ÍBV fékk í kvöld fyrir 2-1 sigur á Stjörnunni á heimavelli.

„Þetta voru virkilega góð þrjú stig og verðskulduð,“ sagði Tryggvi eftir leikinn en viðtalið má sjá í heild sinni hér fyrir ofan. „En erfið voru þau. Við lögðum mikið á okkur gegn Val í bikarnum fyrr í vikunni og það sást á leik okkar í kvöld. Svo hafa einhverjir af okkur náð sér í flensu og þetta kostaði því átök.“

„Mér fannst við skömminni skárri í þessum leik. Völlurinn var furðulega harður og erfiður í kvöld og erum við vanari henni betri, þessari elsku. En þeir mættu okkur af krafti og gáfu okkur leik.“

„Ég er auðvitað ánægður með að vera með sextán stig í deildinni en það er auðvelt að svekkja sig á ýmislegu þegar maður lítur til baka, til dæmis í leiknum gegn Þór í síðustu umferð. Þar fengum við færi til að klára leikinn en nýttum þau ekki.“

„En við leyfðum KR-ingum ekki að stinga okkur af sem er gott.“