"Íslenska flokkakerfið lúið"

Einar Mar Þórðarson, stjórnmálafræðingur, segir flokkaskipti Ásmundar Einars Daðasonar benda til þess að íslenska flokkakerfið sé orðið lúið en Ásmundur sendi frá sér tilkynningu fyrr í dag þar sem hann greindi frá inngöngu sinni í Framsóknarflokkinn. Ásmundur var kjörinn á þing fyrir Vinstri hreyfinguna grænt framboð árið 2009 en hann sagði sig úr flokknum í apríl síðastliðnum.

Einar segir að þó svo nýtt flokkaval Ásmunds hafi komið sér á óvart væri Ásmundur fyrst og fremst þingmaður landsbyggðarinnar, sem passi við áherslur Framsóknarflokksins. Hann segist þó eiga erfitt með að sjá Ásmund, Siv Friðleifsdóttur og Guðmund Steingrímsson fyrir sér í sama flokki og að slíkt hið sama megi segja um félagsmenn marga annarra flokka. Einar telur þetta vera til marks um það að flokkakerfið á Íslandi sé orðið lúið og segir að þörf virðist vera á nýjum og sterkari miðjuflokk en undanfarið hafi íslensku flokkarnir verið að skiptast í þrengri og öfgakenndari hagsmunahópa.

Einar segist ekki sjá fyrir sér að innganga Ásmundar í Framsóknarflokkinn muni hafa mikil áhrif, hvorki á ríkisstjórnina né á aðildarviðræður í Evrópusambandið, en Ásmundur sagði sig úr Vinstri grænum að stórum hluta sökum andstöðu sinnar við aðildarumsókn Íslands að sambandinu.