Kvartanir óánægðs viðskiptavinar spilaðar fyrir bíógesti

Kvikmyndahús í Texas nýtti sér símsvaraskilaboð frá afar reiðum viðskiptavini og eru þau nú spiluð fyrir bíógesti við góðar undirtektir en stúlkan sem las inn skilaboðin hafði verið rekin úr kvikmyndahúsinu fyrir að senda sms á meðan sýning var í gangi.

Þrátt fyrir tvær viðvaranir og beiðnir um að hætta hélt stúlkan áfram að skrifa í símann sinn. Starfsmenn Alamo Drafthouse kvikmyndahússins tóku því að lokum þá ákvörðun að fylgja yfirlýstum reglum sínum og reka stúlkuna út án endurgreiðslu.

Til allrar hamingju fyrir kvikmyndahúsið varð stúlkan svo reið að hún beið ekki boðanna heldur reif upp símann sinn ástkæra og skildi eftir harðorð skilaboð í talhólfi kvikmyndahússins og eru þessi skilaboð sem fyrr segir spiluð við góðar undirtektir fyrir sýningu á öllum bönnuðum myndum sem sýndar eru í Alamo Drafthouse.