Facebook biðst afsökunar

Samskiptavefurinn Facebook hefur gefið út afsökunarbeiðni í kjölfar óánægju notenda vefsins með þær aðferðir sem beitt var þegar vefurinn opnaði fyrir nýja tækni við merkingar fólks á myndum.

Tæknin felur það í sér að Facebook greinir andlit fólks á myndum sem settar hafa verið inn á vefinn, ber andlitin saman við vini eigenda myndanna, ber kennsl á þá sem á myndinni eru og stingur síðan upp á því að viðkomandi séu "merktir" á myndina. Merking við mynd á Facebook felur það í sér að notandi er tengdur við ljósmynd sem þá birtist á síðu hans auk þess sem síða hans verður aðgengileg í gegnum tengil sem birtist við myndina.

Vefurinn viðurkennir að hann hefði átt að kynna viðbótina betur fyrir notendum, sem séu fæstir ósáttir með tæknina sjálfa en heldur reiðir yfir aðferðinni sem notuð var þegar henni var bætt við síðuna þar sem þeir voru ekki spurðir hvort þeir vildu nýta sér þessa nýjung eða ekki. Facebook síðan væri þannig að veita sjálfri sér leyfi til að andlitsgreina myndir af notendum án þess að hafa beðið um leyfi fyrst og án þess að hafa gert notendum sínum nægilega grein fyrir því að hægt væri að loka á þessa viðbót.