Keyptu 30 tonn af bókum - húsið að hrynja

Kanadísk hjón hefðu mátt hugsa sig tvisvar sinnum um áður en þau festu kaup á um 350.000 bókum, sem nágrannakona þeirra var í óðaönn við að brenna. Húsið sem hjónin neyddust til að kaupa utan um bækurnar virðist nú ekki geta borið þunga bókanna lengur en þær vega samtals 30 tonn.

Það var ekkja fyrrum eiganda bókanna sem hafði tekið á það ráð að brenna safnið þegar hún sá enga aðra leið færa til að losa sig við þær, en bókaunnendurnir í næsta húsi gátu ekki horft upp á bálið og keyptu safnið í heild sinni til að bjarga því frá eldinum.

Nú standa þau hinsvegar sjálf frammi fyrir því að þurfa að brenna bækurnar þar sem húsið sem þau neyddust til að kaupa utan um þær er að hruni komið sökum gífurlegs þunga bókanna sem sitja þar óhreyfðar í kössum en enginn fæst til að kaupa þær af þeim.