Eiginkona graða þingmannsins ófrísk

Eiginkona Anthony Weiner, þingmanns demókrataflokksins í Bandaríkjunum, er ófrísk. Þær fréttir koma í kjölfarið á miklu kynlífshneyksli þingmannsins á internetinu í vikunni.

Weiner viðurkenndi í vikunni að hafa sjálfur sent myndir af sér fáklæddum til annarra kvenna en eiginkonu sinnar. Í rúma viku laug hann að fjölmiðlum að einhver hefði hakkað sig inn á Twitter síðu sína og sent myndina á konurnar. Hann hélt svo blaðamannafund í vikunni þar sem viðurkenndi að hafa sent myndirnar sjálfur.

Hjónaband þeirra hefur verið milli tannanna á fólki og velta fjölmiðlar vestanhafs hvort eiginkonan muni fyrirgefa honum athæfið. Það að hún beri nú fyrsta barn þeirra hjóna undir belti gæti breytt ákvörðun hennar. Eiginkonan, Huma Abedin, hefur verið þögul sem gröfin um málið og ekkert tjáð sig um hvort hún ætli að fara fram á skilnað eður ei.

„Við munum komast yfir þetta, ég elska hana ótrúlega mikið og hún líka mig," sagði Weiner á blaðamannafundinum í vikunni.

Weiner á sæti í fulltrúadeild Bandaríkjaþings og bjuggust margir við því að hann myndi bjóða sig fram í næstu borgarstjórnarkosningum New York-borgar sem fara fram árið 2013.