Dalvíkingar fögnuðu árangri Matta

Það var víða fagnað á Dalvík í gær þegar ljóst varð að Vinir Sjonna komust áfram í Eurovisionkeppninni. Einn af vinum Sjonna, Matthías Matthíasson, er nefnilega Dalvíkingur. Það sem meira er, hann situr í bæjarstjórninni þar.

„Það var engin opinber hátíð. Það var bara fagnað í heimahúsum," segir Svanfríður Jónasdóttir, bæjarstjóri á Dalvík. Hún býst við að það verði meira um að vera á laugardaginn þegar aðalkeppnin fer fram. „Ég veit það að veitingastaðurinn hérna við höfnina er að skipuleggja eitthvað," segir Svanfríður.

Hún segir að Dalvíkingar séu mjög ánægðir með strákana, ekki síst Matta. „Ég held að allir hér standi algjörlega hundrað prósent með þessum strákum og ekki síst okkar manni," segir Svanfríður.

Svanfríður segist ekki vera sérstakur aðdáandi Eurovision. Hún hafi samt horft á í gær og muni horfa á útsendinguna á laugardaginn. „Kannski reyni að koma mér einhversstaðar í eitthvað Eurovisionpartý," segir Svanfríður.