Flóafélögin vísa kjaradeilunni til sáttasemjara

Sigurður Bessason, formaður samninganefndar Flóafélaganna afhenti í dag ríkissáttasemjara, Magnúsi Péturssyni bréf þar sem kjaradeilu stéttarfélaganna Eflingar-stéttarfélags, Verkalýðsfélagsins Hlífar og VSFK var formlega vísað til embættis sáttasemjara.

Á heimasíðu Eflingar segir Sigurður að ástæða þess að félögin vísa nú yfirstandandi kjaradeilu til sáttasemjara sé fyrst og fremst sú að Samtök atvinnulífsins hafni gerð kjarasamninga, hvort sem er til lengri eða skemmri tíma. Beinar og milliliðalausar viðræður aðila séu því komnar í hnút.

Þá segir Sigurður að Flóafélögin muni af sinni hálfu hverfa aftur til upprunalegrar kröfugerðar um stuttan kjarasamningstíma.