Innbrotsþjófar teknir tvisvar sama daginn

Karl á fertugsaldri og kona á þrítugsaldri voru handtekin í tvígang fyrir þjófnað og innbrot í Hafnarfirði á laugardag. Að sögn lögreglu voru þau fyrst handtekin snemma morguns eftir að hafa stolið GPS-tæki og fleiri verðmætum úr ólæstum bílum.

Lögregla kom hinum stolnu munum í réttar hendur og var fólkinu sleppt eftir að málið taldist upplýst. Þjófarnir létu sér hinsvegar ekki segjast og héldu uppteknum hætti og brutust inn í bíl á öðrum stað í bænum þegar nokkuð var liðið á daginn. Parið var því handtekið á nýjan leik en í fórum þeirra fundust illa fengnir munir úr fyrrnefndum bíl.

Þá var karl á þrítugsaldri handtekinn eftir innbrot á heimili í Garðabæ í gærmorgun. Þar hafði hann stolið fartölvu og ýmsum fleiri munum. Þýfið fannst óskemmt skammt frá vettvangi og var hinum stolnu hlutum komið aftur í réttar hendur.