Fimmtán drukknir og sex dópaðir stoppaðir um páskana

Fimmtán ökumenn voru teknir fyrir ölvunarakstur á höfuðborgarsvæðinu um páskana og sex voru teknir fyrir að aka undir áhrifum fíkniefna.

Af hinum drukknu voru ellefu stöðvaðir í Reykjavík og tveir í Kópavogi og Hafnarfirði. „Fjórir voru teknir á skírdag, tveir á föstudaginn langa, fjórir á laugardag, einn á páskadag og fjórir á annan í páskum. Þetta voru þrettán karlar á aldrinum 18-66 ára og tvær konur, 29 og 39 ára. Þrír þessara ökumanna höfðu þegar verið sviptir ökuleyfi,“ segir í tilkynningu frá lögreglu.

Fimm þeirra sem óku áhrifum fíkniefna voru stöðvaðir í Reykjavík og einn í Hafnarfirði. „Tveir voru teknir á föstudaginn langa og laugardag og einn á páskadag og annan í páskum. Þetta voru fjórir karlar á aldrinum 28-36 ára og tvær konur, 27 og 36 ára. Fjórir þessara ökumanna höfðu þegar verið sviptir ökuleyfi,“ segir ennfremur.