Á að hafa afleiðingar ef þau standa ekki við gefin loforð

Bjarni Benediktsson, formaður Sjálfstæðisflokksins, sagði á fundi í Valhöll í morgun með félagsmönnum, að það eigi að hafa afleiðingar fyrir fjármálafyrirtækin ef þau standa ekki við gefin loforð um að koma atvinnulífinu til hjálpar og endurskipuleggja skuldir fyrirtækjanna. „Við komum ekki nýju fjármálakerfi á fót til þess að það gæti haldið atvinnulífinu í gíslingu," sagði Bjarni.

Hann sagði að ekki eigi að viðurkenna lán í langtímavanskilum sem hefðbundna eign sem eitthvert mark væri takandi á. Slík lán væru falseignir í reikningum bankanna. Lítil og meðalstór fyrirtæki glímdu við mikinn vanda sem yrði að lesa. „Þeir hagsmunir sem undir eru réttlæta grimmar aðgerðir gagnvart fjármálafyrirtækjunum til þess að koma hagkerfinu af stað."

Þá sagði hann að áætlanir fjármálafyrirtækjanna miðuðu að því að þau fengju allt sitt, með aukinni vinnu þeirra sem reka fyrirtækin, en alla hvata vantaði fyrir fyrirtækin að vinna sig út úr vandanum. Bankarnir ætluðust til að fyrirtæki stæðu undir 100% skuldsetningu. Fyrirtæki í þeirri stöðu gæti ekki fjárfest í nýjum tækjum til að auka framleiðni né ráðið til sín fólk, til þess vantaði alla hvatningu og getu.

„Það verður að brjóta nýjar leiðir, að brjóta þau klakabönd af atvinnulífinu sem það er fast í, vegna aðgerðaleysis stjórnvalda og óbilgirni fjármálafyrirtækjanna," sagði Bjarni.

Bjarni sagðist fagna fimmtán ára áætlun Landsvirkjunar sem kynnt hefði verið í gær. „En þar er settur sá fyrirvari, að menn yrðu að vera tilbúnir til að nýta tækifærin, að vera tilbúnir að nýta virkjunarkostina, ekki bara horfa á þá."

Það væri ánægjulegt að hefja ætti vinnu við Búðarhálsvirkjun en hann sagði óskiljanlegt að menn skyldu ekki horfa til Norðlingaölduveitu, sem væri upplagður virkjunarkostur. „Þangað hefði verið hægt að sækja orku með 10 milljarða minni tilkostnaði en á Búðarhálsi."