Dómurinn yfir Baldri gefur tóninn

Jón Þór Ólason, lektor í lögfræði við Háskóla Íslands, segir dómstóla hafa sent í dag ákveðin skilaboð með dómnum yfir Baldri Gunnlaugssyni, fyrrverandi ráðuneytisstjóra í fjármálaráðuneytinu. „Hann er mjög þungur. Þetta er tveggja ára fangelsi og síðan er þarna líka upptaka á hárri fjárhæð. Það sem er merkilegast við hann er að þarna er í fyrsta sinn verið að dæma á grundvelli ákvæðis um innherjasvik sem kom í fyrsta sinn í lög frá 1989,“ sagði Jón Þór í seinnifréttum Ríkissjónvarpsins í kvöld.

Baldur var í dag dæmdur í tveggja ára óskilorðsbundið fangelsi fyrir innherjasvik og brot í opinberu starfi fyrir að selja hlutabréf sín í Landsbankanum fyrir 192 milljónir króna rétt fyrir hrun eftir að hafa setið fundi sérstakrar nefndar um fjármálastöðugleika þar sem ræddar voru trúnaðarupplýsingar um stöðu bankans og fjármálakerfisins alls.