Spyr hvort einhver þurfi ekki að ákveða hvort landsbyggðin lifi

Oddviti Vopnafjarðarhrepps spyr hvort einhver þurfi ekki að fara að taka ákvörðun um það hvort landsbyggðin eigi að lifa eða ekki.

Íbúum Vopnafjarðar hefur fækkað um nærri þrjátíu prósent á rúmum tuttugu árum. Í Vopnafjarðarhreppi bjuggu 940 manns fyrir 23 árum en ef héraðið hefði haldið sínum hlut ættu yfir 1.200 manns að búa þar. Þess í stað er íbúafjöldinn kominn niður í 670 manns.

Oddvitinn, Þórunn Egilsdóttir, segir þetta gerast þrátt fyrir tiltölulega gott atvinnuástand og nefnir sem dæmi að HP Grandi hafi verið að byggja upp mikla vinnslu. Þá sé rekið sláturhús á Vopnafirði, eitt af fáum á landsbyggðinni. Þórunn segir eitthvað bogið við það að íbúum skuli samt stöðugt fækka. Hún spyr hver skilaboðin séu og hvernig við ætlum að hafa landsbyggðina.

"Hvaðan erum við að fá tekjurnar? Hvernig ætlum við að hafa samfélagið okkar? Þarf ekki bara einhver að fara að taka ákvörðun um það hvort landsbyggðin á að lifa eða ekki?" spyr oddvitinn.

Spurð hversvegna fólk flytji ekki til staðar eins og Vopnafjarðar og hversvegna fólki fækki áfram svarar Þórunn að fólk átti sig ekki á því hvað það sé gott að búa á stað eins og Vopnafirði. Þar sé mjög fjölbreytt mannlíf og skemmtilegt og mikið um að vera. Menningin sé góð, mikil félagastarfsemi og hellingur um að vera.

Sjálf segist hún vera brottfluttur Reykvíkingur: "Já, ég ætlaði að vera hér einn vetur fyrir aldarfjórðungi síðan. Ég er hérna enn."