Facebook síðu um einelti í Hveragerði lokað

Facebook síðu sem helguð var einelti í grunnskóla Hveragerðis hefur verið lokað. Aðstandendur síðunnar segjast hafa tekið ákvörðunina eftir mikla íhugun en þeir segjast hafa orðið fyrir áreiti með símhringingum og póstsendingum þar sem þrýst var á þá að loka síðunni. Þeir segjast hafa orðið fyrir beinum og óbeinum hótunum frá hendi bæjarbúa.

„Sorgleg staðreynd er það að svo virðist sem bæjarbúar sjái ekki sóma sinn í að horfa á það alvarlega ástand sem yfirvöld skólans hafa komið sér í með ráðaleysi um mál nokkura einstaklinga sem enn eru skráðir nemendur í skólanum,“ segir í yfirlýsingu frá Davíð Michelsen og Róberti Guðmundssyni aðstandendum síðunnar. „Þekki ég af eigin raun hvernin tekið var á málunum á minni skólagöngu og get ég ekki trúað því að yfirstjórn skólans snúi skyndilega við blaðinu og geri allt í sem í þeirra valdi stendur. Til að mynda eru meintir gerendur enn á sínum stað. Svo virðist sem þagga eigi þetta niður enn eina ferðina og láta sem ekkert sé.“

Davíð og Róbert segja að fórnarlömb eineltis beri oftast ekki utan á sér þau djúpu sár sem einelti setji á sálina „og er þá í raun ekki hægt að ætlast til af skólastarfsliði að það sjái alltaf hvað er að gerast enda er andlegt ofbeldi vel falið.“

Hann segir að þess vegna þurfi að stórefla eineltisfræðslu í öllum skólum og fylgja eftir hverju máli sem kemur inná borð til handhafa skólavalds því nú þegar er skaðinn mikill á marga einstaklinga. „Hvetja þarf alla sem telja sig verða fyrir ofbeldi í grunnskólum að stíga fram og segja frá, öðruvísi er ekki hægt að taka á vandanum. En munum að margir þolendur segja oftast ekki frá því ofbeldi sem þeir verða fyrir, sem gerir það svo brýnt að við séum vakandi fyrir því sem er að gerast í kringum okkur.“

„Foreldrar, fræðum börnin okkar vel og oft svo ekki þurfi að senda brotnar sálir útí lífið. Við berum öll ábyrgð á velferða barna okkar,“ segir að lokum.

Facebook síða um einelti á Íslandi almennt er þó enn opin.