Um helmingur þjóðarinnar hefur verið bólusettur

Alls hafa tæplega 156 þúsund manns verið bólusettir gegn svínainflúensu frá því að bólusetningar hófust haustið 2009. Í farsóttarfréttum Sóttvarnarlæknis kemur fram að í flestum aldurshópum hafi um og yfir 50% látið bólusetja sig, nema í aldurshópunum 20-40 ára en þar er hlutfallið öllu lægra. Það var jafnframt í þessum aldurshópum sem inflúensunnar hefur orðið vart nú í vetur.

Sóttvarnarlæknir segir að rúmlega 50 þúsund Íslendingar, einkum þeir sem voru í skilgreindum áhættuhópum, hafi verið bólusettir gegn bæði svínainflúensu og árstíðabundinni inflúensu síðastliðið haust.

„Ekki er vafi á því að hin mikla þáttttaka í bólusetningu gegn svínainflúensu hefur valdið því að lítið bar á þeim faraldri í vetur,“ segir í farsóttarfréttum. Engu að síður hafi kona um þrítugt veikst alvarlega af völdum svínainflúensunnar í vetur og þurft á meðferð á gjörgæslu að halda í janúar.