Níu bílar skemmdust í fjórum árekstrum við Kópavogslæk

Níu bílar skemmdust töluvert í morgun eftir að bíll ók utan í vegrið á Hafnarfjarðarvegi við Kópavogslækinn. Mikil hálka var á veginum en bíllinn var að koma niður brekku að Kópavogslæk og stefndi í suður.

Lögregla var kölluð til og voru fjórir lögreglubílar á staðnum með blikkandi ljós. Þrátt fyrir það virtist sem ökumenn tækju alls ekki tillit til aðstæðna og keyrðu á fullri ferð eftir veginum þrátt fyrir ljósin.

Lögregla hafði þurft að loka annarri akreininni og þegar ökumenn komu að þrengingunni hlekktist þeim nokkrum á með þeim afleiðingum að fjögur óhöpp urðu á skömmum tíma. Alls skemmdust níu bílar talsvert í árekstrunum en engin slys urðu á fólki.

Lögreglan brýnir fyrir fólki að taka tillit til aðstæðna þegar svona slæmar aðstæður eru uppi.