Meðal annars ákærður fyrir íslenskar leyniupplýsingar

Bandarísk yfirvöld hafa ákært Bradley Manning um 22 ákæruatriði til viðbótar þeim, sem hann hefur áður verið á ákærður fyrir. Hann er grunaður um að hafa stolið hernaðarupplýsingum og lekið til Wikileaks.

Bradley Manning er fyrrverandi hermaður en hann var handtekinn á síðasta ári grunaður um að hafa lekið alls 620 þúsund skjölum, meðal annars um diplómatísk samskipti fjölmargra ríkja við Bandaríkin, til Wikileaks-síðunnar. Skjölin voru svo birt á síðasta ári og ollu gríðarlegum titringi í Bandaríkjunum, og ekki síður öðrum ríkjum.

Manning hafði áður verið ákærður fyrir tólf ákæruatriði en nú hafa bandarísk yfirvöld bætt hinum 22 atriðunum við. Bandarísk yfirvöld tilkynntu hinsvegar að þau færu ekki fram á dauðarefsingu verði hann fundinn sekur, líkt og ráðgert var í upphafi.

Meðal nýrra ákæruatriða gegn Manning eru ásakanir um að hafa lekið 75 skjölum sem nefnast Reykjavík-13. Manning er vistaður í hámarksöryggisfangelsi í Virginíufylki.