Útvegaði burðardýr til fíkniefnasmygls

Brynjar Mettinisson, sem situr í gæsluvarðhaldi í Bangkok í Taílandi, útvegaði arabískum manni sem hann hafði verið í samskiptum við á netinu burðardýr sem flytja átti einn lítra af metamfetamíni í vökvaformi til Japans.

Chamnarn Viravan, aðalræðismaður Íslands í Taílandi, hefur ekki fengið afrit af skýrslu lögreglunnar vegna handtöku Brynjars en hefur verið í sambandi við unnustu hans ytra. Frásögn Viravans af tildrögum málsins er önnur í svarskeyti hans til Fréttablaðsins en fram hefur komið.

Brynjar var úrskurðaður í þriggja mánaða gæsluvarðhald í Bangkok á mánudag í síðustu viku eftir að lögregla handtók hann með öðrum manni. Samkvæmt fyrri frásögnum var hann á heimleið frá veitingastað ásamt unnustu sinni þegar þau hittu ástralskan mann sem Brynjar kannaðist lítillega við. Lögreglu hafi þá borið að sem fann fíkniefni á þeim ástralska en engin á Brynjari. Þeir hafi verið handteknir vegna gruns um fíkniefnamisferli.

Viravan hefur hins vegar eftir unnustu Brynjars að arabískur maður hafi sett sig í samband við Brynjar og reynt að fá hann til að flytja fyrir sig lyf til Japans. Þeir áttu samskipti sín á milli á Skype-samskiptaforritinu á netinu og mun unnustan hafa heyrt Brynjar spyrja hvort lyfið væri ólöglegt. Því hafi sá arabíski neitað, sagt Brynjari að hafa ekki áhyggjur, um lyfjablöndu væri að ræða sem ætti að afhenda lækni í Japan.

Samkvæmt lýsingu Viravans sagði sá arabíski Brynjari að hann þyrfti ekki að flytja lyfið sjálfur, hann gæti fundið burðardýr fyrir sig. Engu að síður fengi hann 2.500 Bandaríkjadali fyrir viðvikið, tæpar 290 þúsund krónur.

Brynjar fann að loknum mann sem tilbúinn var til verksins og ákvað að hitta hann á Grand Mercure Fortune hótelinu, sem er í nýjasta borgarhluta Bangkok, á mánudag.

Þeir hringdu þaðan í arabíska manninn, sem kom með eiturlyfin á hótelið. Burðardýrið reyndist vera rannsóknarlögreglumaður og voru tvímenningarnir handteknir á staðnum.

Aðalræðismaður Íslands í Taílandi hefur útvegað Brynjari lögfræðing og áttu þeir að hittast í gær eða í dag. Réttað verður í máli Brynjars snemma í ágúst, að sögn aðalræðismannsins.

jonab@frettabladid.is