Utankjörfundur hefst á morgun

Utankjörfundaratkvæðagreiðsla erlendis vegna þjóðaratkvæðagreiðslu, um framtíðargildi laga um Icesavesamninginn sem fram fer 9. apríl 2011 hefst á morgun og fer fram í öllum sendiráðum Íslands erlendis og aðalræðisskrifstofum Íslands í New York,  Winnipeg, og Þórshöfn í Færeyjum. Einnig er unnt að kjósa utan kjörfundar eftir samkomulagi hjá kjörræðismönnum Íslands erlendis, samanber meðfylgjandi lista.

Utanríkisráðuneytið býst við því að kosið verði á um það bil 235 stöðum í 84 löndum. Hagnýtar upplýsingar um kosningarnar er að finna á vefsetrinu: www.kosning.is. Athygli kjósenda er ennfremur vakin á því, að þeim ber sjálfum að póstleggja atkvæði sín eða koma þeim á annan hátt í tæka tíð til viðkomandi kjörstjórnar á Íslandi.