Neitaði að ræða við Jón Baldvin í miðju viðtali

„Ég verð því miður að ræða þetta við Jón á öðrum nótum. Ég tek ekki þátt í svona umræðum um keypta sérhagsmunapotara," sagði Friðrik Arngrímsson, framkvæmdarstjóri LÍÚ en það sló í brýnu á milli hans og Jón Baldvins Hannibalssonar, fyrrum ráðherra, í viðtali í útvarpsþættinum Sprengisandi sem blaðamaðurinn Sigurjón M. Egilsson sér um.

Þeir tókust á um stöðu sjávarútvegsins og hvaða áhrif aðild að ESB hefði á íslenskan sjávariðnað. Viðtalið hófst á því að Jón Baldvin tók sérstaklega fram að Friðrik væri með launaða hagsmuni og það yrði að taka það skýrt fram. Hann benti á til samanburðar þjóðmálaumræðuna í Bandaríkjunum og sagði það alltaf tekið sérstaklega fram ef rætt væri við launaðan hagsmunagæslumann.

Um miðbik viðtalsins gafst Friðrik upp og sagðist eingöngu svara spurningum og eiga í samskiptum við þáttastjórnandann Sigurjón.

Jón Baldvin sakaði meðal annars Friðrik að ljúga upp í opið geðið á þjóðinni um áhrif Evrópusambandsins á sjávaútveginn og sakaði þá, sem eru andstæðingar ESB, að vera með alvarlega ásakanir í garð þeirra sem væru hlynntir því, eins og landráðabrigsl. Slíkt væri ótækt í umræðunni.

Í samtalinu kom þó fram að sjávarútvegurinn er gríðarlega skuldsettur en skuldirnar eru um fimmhundruð milljarðar að sögn Friðriks. Jón Baldvin vildi meina að þær væru nærri sex hundruð milljarðar.

Þá var Jón Baldvin vonlítill um að Íslendingar gætu haldið fjárfestingarétti sínum yfir íslenskum sjávarútvegsfyrirtækjum þar sem iðnaðurinn væri eins skuldugur og raun ber vitni.

Jón Baldvin sagði hinsvegar alveg ljóst að Ísland héldi yfirráðum sínum yfir fiskveiðisvæðinu. Sameiginlega fiskveiðikerfið væri frekar hugsað fyrir þau Evrópulönd sem veiði á sömu miðum. Slíkt eigi ekki við Íslendinga.