Allt féð verði notað í viðhald á vegum

Sveitarstjórnarmenn og forsvarsmaður Vegagerðarinnar telja að viðhald og þjónusta eigi að vera í forgangi næstu árin á kostnað nýframkvæmda. Þeir segja gott dæmi um niðurskurð til vegamála að aðeins tólf milljónir króna eru eyrnamerktar vegamálum á Norðurlandi vestra á gildistíma samgönguáætlunar til ársins 2012. Svipaða sögu er að segja um allt land.

Lögð hefur verið fram á Alþingi þingsályktunartillaga um fjögurra ára samgönguáætlun 2009-2012. Þegar framlög til vegamála í Skagafirði og Húnavatnssýslum eru skoðuð kemur fram að upphæðin er öll mismunur kostnaðaráætlana fjögurra verkefna og fjárveitinga til þeirra árið 2009. Engin framlög eru tiltekin í þingsályktunartillögunni fyrir árin 2011 og 2012.

Jón Óskar Pétursson, framkvæmdastjóri Samtaka sveitar­félaga á Norðurlandi vestra, segir svæðið ekkert einsdæmi heldur sé þetta ástand gegnumgangandi. Hann segir engan fara fram á stórar nýframkvæmdir. „En þegar verið er að skera niður framlög til vegamála hlýtur forgangsröðin að vera að verja það sem fyrir er. Að öðrum kosti eru menn að eyðileggja vegakerfið. Þetta er dýrasta lán sem hægt er að taka. Svo eru öryggismálin í þessu samhengi ótalin.“

Jón Óskar minnir á að allir þungaflutningar á milli Reykjavíkur og Akureyrar fari um vegi á svæðinu. Í því ljósi hljóti öllum að vera ljóst að lágmarksþörf til framkvæmda í vegamálum sé hvergi nærri mætt.

Magnús V. Jóhannsson, svæðis­stjóri Vegagerðarinnar á Norðvesturlandi, segir að það fjármagn sem tiltekið er í samgönguáætlun eftir svæðum segi ekki alla söguna, en það sé vissulega af skornum skammti. Fjármagn til þjónustu og viðhalds er sér liður í samgönguáætluninni. Vegagerðin tekur ákvörðun um hvernig fénu er varið, segir Magnús, og það liggi fyrir að Norðvesturland muni njóta þess að hluta.

Hann tekur undir það sjónarmið að leggja ætti megináherslu á að verja þau mannvirki sem fyrir eru. „Peningar til viðhalds minnka mjög mikið og af því höfum við vegagerðarmenn mestar áhyggjur.“ Hann segir vegakerfið á Norðvesturlandi í ásættanlegu ástandi og þungatakmarkanir muni brátt heyra sögunni til. Hins vegar megi spyrja sig hversu lengi vegakerfið þar, og annars staðar á landinu, þolir fjársvelti, segir Magnús. svavar@frettabladid.is