Reina sér á eftir Benitez

Það kom Pepe Reina, markverði Liverpool, í opna skjöldu þegar hann heyrði að Rafael Benitez væri hættur sem knattspyrnustjóri liðsins.

Reina er nú að undirbúa sig fyrir HM með spænska landsliðinu en fréttirnar af brotthvarfi Benitez bárust í dag.

Það var Benitez sem fékk Reina til félagsins á sínum tíma en sá síðarnefndi hefur áður margoft sagt að hann hafði ekki trú á því að Benitez myndi fara frá félaginu í sumar.

„Þetta er leiðinleg stund fyrir Liverpool, Rafa Benitez og þá leikmenn sem hafa unnið með honum," sagði Reina við spænska fjölmiðla í kvöld.

„Hann var félaginu afar mikilvægur þau sex ár sem hann var þar. Ég átti aldrei von á því að hann myndi fara."

„En það eina sem ég get gert er að þakka honum þá trú sem hann sýndi mér og óska ég honum alls hins besta."