Verkfall MLS-deildarinnar gæti komið sér vel fyrir Everton

Landon Donovan gæti spilað lengur með Everton í ensku úrvalsdeildinni víst að leikmenn bandarísku atvinnumannadeildarinnar, MLS, kusu það að fara í verkfall ef samningar takast ekki fyrir opnunarleik tímabilsins sem fer fram 25. mars.

„Verkfallið í Bandaríkjunum gæti gefið okkur möguleika á því að halda honum aðeins lengur. Við erum aldrei búnir að tala um að kaupa hann en ég tel að þegar Landon Donovan kemur til Bandaríkjanna á ný þá sér hann það að hann vill miklu frekar spila í ensku úrvalsdeildinni," sagði David Moyes, stjóri Everton.

Moyes er mjög ánægður með Landon Donovan. „Hann hefur staðið sig mjög vel, komst fljótt inn í allt hjá okkur og setti sitt mark á liðið," sagði Moyes og hann ætlar líka að reyna að fá hann aftur á láni á næsta ári.