Icelandair harmar verkfallsboðun flugvirkja

Icelandair harmar þá ákvörðun Flugvirkjafélags Íslands að boða til verkfalls dagana 22.-28. febrúar næstkomandi. Þetta kemur fram í tilkynningu sem Guðjón Arngrímsson upplýsingafulltrúi Icelandair sendi fjölmiðlum. Segir hann að verkfallið geti valdið viðskiptavinum, íslenskri ferðaþjónustu og atvinnulífi miklu tjóni.

Guðjón segir að Icelandair hafi á undanförnum vikum samið við aðra starfshópa án truflana á flugi og vonast sé til þess svo verði einnig nú. Í samningaviðræðum að undanförnu greini aðila fyrst og fremst á um kröfu Flugvirkjafélagsins um 25% launahækkun. Að mati Icelandair er slík krafa úr takti við það sem samið hefur verið um á almennum vinnumarkaði. Guðjón segir að Icelandair hafi boðið Flugvirkjafélaginu sambærilegar kjarabætur og samið var um við aðra starfshópa á undanförnum vikum og geti ekki gengið að ítrustu kröfum flugvirkja um langtum meiri launahækkun en samstarfsmenn þeirra hafa samið um.

Guðjón segir að ef af verkfalli verði dagana 22.-28. febrúar muni það hafa áhrif á ferðir tæplega 20 þúsund farþega. Unnið sé að því að ná samningum og vonist Icelandair til þess að ekki komi til verkfalls.