Styttist í Van Persie

Hollendingurinn Robin Van Persie er byrjaður að æfa á nýjan leik en þó ekki af fullum krafti. Hann stefnir á að spila á ný áður en tímabilinu lýkur.

Van Persie hefur ekkert spilað síðan hann meiddist alvarlega á ökkla í vináttulandsleik Hollands og Ítalíu.

Þá var óttast að hann myndi missa af öllu tímabilinu en nú vonast menn hjá Arsenal til þess að hann nái síðustu leikjum tímabilsins.

„Læknarnir segja mig vera tilbúinn en ég á eftir að styrkja mig. Þegar ég er búinn að styrkja mig get ég farið að æfa með liðinu.  Ég er ekki alveg kominn svo langt en erfiðasti hjallinn er að baki. Ég hef verið að æfa með bolta síðustu vikur og það lítur allt vel út," sagði Hollendingurinn skæði.