Gæti lent í fangelsi fyrir að aka á nagladekkjum

Karlmaður á fertugsaldri þarf að dúsa í fangelsi í tvo daga greiði hann ekki 10 þúsund króna sekt sem Héraðsdómur Suðurlands dæmdi hann til að greiða fyrir að aka um á nagladekkjum að sumri.

Í ákæru sem er gefin út af lögreglustjóranum á Selfossi kemur fram að maðurinn er ákærður fyrir að hafa ekið bifreið búinn tveimur nagladekkjum að aftan austur Suðurlandsveg við Kotströnd í Ölfusi þann 10. ágúst í hitteðfyrra.

Fram kom við þingfestingu málsins í morgun að ákærði væri ekki mættur þrátt fyrir birtingu fyrirkalls þar sem þess var getið að ef ákærði sækti ekki þing mætti búast við því að fjarvist hans yrði metin til jafns við það að hann viðurkenndi að hafa framið það brot sem hann var ákærður fyrir og að dómur yrði lagður á málið að honum fjarstöddum.

Í dómsorði segir svo að ákærði skuli greiða 10 þúsund krónur í sekt til ríkissjóðs innan fjögurra vikna frá uppkvaðningu dómsins en sæti ella fangelsi í 2 daga.