Quinn: Steve Bruce öruggur í starfi þótt að Sunderland falli

Niall Quinn, stjórnarformaður Sunderland, hefur sagt stjóranum Steve Bruce að hann sé öruggur í starfi þótt að liðið falli úr ensku úrvalsdeildinni í vor. Sunderland vann sinn fyrsta sigur í 14 leikjum í vikunni þegar lærisveinar Bruce skelltu Bolton 4-0 og útlitið er nú aðeins bjartara þegar liðið var ekki búið að vinna leik síðan í nóvember.

„Ef við föllum úr deildinni þá verður Steve Bruce áfram stjóri. Ég tel að hann hafi sömu ástríðu fyrir félaginu og stuðningsmennirnir og sömu ástríðu fyrir félaginu og eigandinn. Hann ver klúbbinn út í eitt og við getum ekki beðið um meira," sagði Niall Quinn.

„Við erum að reyna að stíga skref upp á við í erfiðustu deild í heimi. Það kallar á þor, einbeitingu og mikla vinnu í samvinnu við allt annað sem tengist því að búa til sterkt lið eins og kaup á réttu mönnunum, það að spila rétta takt og mæta með rétt hugarfar í leiki," segir Niall Quinn.