Sprengingin ekki hryðjuverk

Nú er talið að ekki hafi verið um tilraun til hryðjuverks að ræða þegar að sprengja sprakk á hóteli í Kaupmannahöfn í dag.

Fram kemur á fréttavef Berlingske Tidende að upplýst hafi verið um það að sprengiefni hafi ekki fundist á manninum sem lá særður í Ørstedsparken í Kaupmannahöfn í dag.

Dómsmálaráðuneytið segir að ólíklegt sé að um verknað af hálfu heittrúaðra islamista hafi verið að ræða. Ólíklegt sé að atvikið geti flokkast undir hryðjuverk. Hins vegar sé líklegt að annarskonar refsiverður verknaður hafi leitt til þess að sprengjan sprakk.

Eins og fram kom á Vísi í dag sprakk sprengjan á salerni á Hotel Jörgensen í Kaupmannahöfn. Maðurinn fannst svo í Ørstedsparken með breitt belti um sig miðjan og var á tíma óttast að í beltinu væri sprengiefni. Svo reyndist ekki vera þegar betur var að gáð.