Úlfarnir fóru illa með West Ham - dagar Zola taldir

West Ham tapaði 1-3 á heimavelli á móti Wolves í algjörum sex stiga leik í fallbaráttu ensku úrvalsdeildarinnar í kvöld. Þetta var fimmta tap West Ham í röð og liðið missti með þessu Úlfanna fjórum stigum fyrir ofan sig.

Kevin Doyle kom Wolves í 1-0 á 28. mínútu leiksins og þannig var staðan í hálfleik. Ronald Zubar og Matthew Jarvis gerðu síðan út um vonir West Ham með tveimur mörkum með þriggja mínútna millibili á 58. og 61. mínútu. Guillermo Franco minnkaði muninn fyrir West Ham í uppbótartíma.

Gianfranco Zola, stjóri West Ham, stjórnaði kannski þarna sínum síðasta leik hjá félaginu en það var skrifað um það fyrir leikinn að ekkert nema sigur í þessum leik gæti bjargað starfinu hans. Stuðningsmenn sendu félaginu skilaboð með því að yfirgefa Upton Park löngu áður en leik lauk.

West Ham situr nú í síðasta örugga sætinu í deildinni, þremur stigum á undan Burnley og Hull sem koma í næstu sætum. Hull á leik til góða og getur því náð West Ham að stigum.

Wolves hefur fengið sjö stig út úr síðustu þremur leikjum sínum og þessi stig gæti farið langt með að bjarga lærisveinum Mick McCarthy frá falli þó að enn sé nóg eftir af leikjum í deildinni.