Lennon enn í vandræðum vegna nárameiðsla

Kantmaðurinn knái Aaron Lennon hjá Tottenham hefur orðið fyrir bakslagi í viðleitni sinni við að ná sér af nárameiðslum sem hafa plagað hann undanfarið.

Lennon átti að vera klár í slaginn fyrir leik Tottenham gegn Wigan um helgina en nárameiðslin tóku sig upp að nýju á æfingu daginn fyrir leikinn og knattspyrnustjórinn Harry Redknapp hjá Tottenham bindur vonir við að leikmaðurinn þurfi ekki að gangast undir aðgerð og geti snúið brátt aftur.

„Vonandi verður hann klár eftir tvær vikur en það er oft erfitt að dæma þegar nárameiðsli eru annars vegar. Vonandi nær hann að snúa aftur og hjálpa liðinu að ná takmarki sínu og þá er ég viss um að hann spili sig inn í landsliðshópinn fyrir lokakeppnina næsta sumar," sagði Redknapp í viðtali við Sky Sports fréttastofuna í dag.