Hálft ár eftir til að rifta gjöfum til maka

Eftir rúmt hálft ár rennur út frestur til að krefjast þess að eignatilfærslum manna, til dæmis á maka sína, í miðju bankahruni verði rift. Vegna þessa hafa þrír þingmenn Samfylkingarinnar í þrígang lagt fram frumvarp á Alþingi um að þessi frestur verði lengdur.

Mörg dæmi voru um það um og eftir bankahrun að eignamenn og starfsmenn fjármálafyrirtækja afsöluðu íbúðarhúsum sínum, bílum, sumarhúsum og jörðum, á eiginkonur sínar eða annað nákomið fólk, eða færðu eignirnar í eignarhaldsfélög.

Meðal þeirra sem nefndir hafa verið í þessu samhengi eru Sigurður Valtýsson og Erlendur Hjaltason, forstjórar Existu, Styrmir Þór Bragason, forstjóri MP Banka, nokkrir fyrrverandi yfirmenn hjá Kaupþingi, Bakkavararbræðurnir Ágúst og Lýður Guðmundssynir, sem færðu eignir sínar í eignarhaldsfélög, auk annarra.

Verði þessir menn gjaldþrota er, samkvæmt núgildandi lögum, hægt að rifta gjafagerningunum svo framarlega sem farið er fram á greiðslustöðvunina innan við tveimur árum frá því að eignatilfærslan á sér stað. Nú eru um sjö mánuðir þar til sá frestur er liðinn í flestum tilfellum.

Til að koma í veg fyrir „að hagsmunir spillist vegna álags og tímaskorts" vilja þrír þingmenn Samfylkingar, með Helga Hjörvar í fararbroddi, lengja þennan frest í fjögur ár þegar um ræðir gjörninga frá bankahruni og út næsta ár. Málið hefur í þrígang verið lagt fyrir Alþingi og var síðast rætt í gær. Helgi sagðist í samtali við Fréttablaðið telja mjög mikilvægt að frumvarpið verði að lögum fyrir vorið.

Ekki liggur fyrir hvort einhverjir þeirra, og þá hverjir, sem stóðu í slíkum eignatilfærslum í hruninu stefna í gjaldþrot. Takist hins vegar öllum þeirra að forðast gjaldþrot þar til riftunarfresturinn er liðinn er samt ekki öll nótt úti fyrir hugsanlega kröfuhafa. Þeir gætu þá höfðað skaðabótamál á hendur viðkomandi telji þeir að eignatilfærslan hafi verið málamyndagerningur til þess eins að koma eignum undan. Það er þó mun torsóttara en einföld riftun gjafagernings innan tímamarka.

Enn á eftir að ákveða hvort þeir starfsmenn Kaupþings sem fengu lán til hlutabréfakaupa fá persónulegar ábyrgðir sínar felldar niður. Fari svo, kann hin niðurfellda upphæð að vera skattskyld. Knýi sú skattskylda menn í þrot gagnast það þeim hins vegar ekki að hafa flutt eign sína á maka, enda eru hjón samábyrg fyrir skattgreiðslum.stigur@frettabladid.is