Á batavegi eftir slysið í Hoffelli

Báðir mennirnir sem misstu meðvitund um borð í fjölveiðiskipinu Hoffelli á Fáskrúðsfirði á sunnudagsmorgun eru á batavegi.

Annar þeirra var útskrifaður af gjörgæsludeild Landspítalans í gær. Hinn er þar enn, hann er kominn úr öndunarvél og verður væntanlega útskrifaður þaðan í dag.

Slysið varð þegar mennirnir voru að landa gulldeplu úr skipinu og talið er líklegt að súrefnisskortur í lest skipsins hafi orðið til þess að mennirnir misstu meðvitund. Þegar magainnihald fiska byrjar að rotna eyðist súrefni. Þetta ferli er sérstaklega hratt þegar um minni fiska er að ræða líkt og með gulldeplu og loðnu.