Vilja funda um ráðningarmál ÍLS

Þingmennirnir Pétur H. Blöndal og Guðlaugur Þór Þórðarson hafa farið fram á að efnt verði til fundar í félagsmálanefnd vegna ráðningarferlis framkvæmdastjóra Íbúðalánasjóðs.

Óskað er eftir að fyrir nefndina komi félagsmálaráðherra, formaður stjórnar Íbúðalánasjóðs og framkvæmdastýra Jafnréttisstofu.

Ástæðan er að Árni Páll Árnason, félagsmálaráðherra, skipaði sérstaka nefnd til þess að ráða í starf framkvæmdastjóra sjóðsins.

Stjórn Íbúðalánasjóðs náði ekki samstöðu um ráðningu nýs framkvæmdastjóra. Því var skipaði Árni Páll sérstaka valnefnd til þess að gera tillögu um hæfasta umsækjandann.

Starfandi framkvæmdastjóri, Ásta H. Bragadóttir, naut stuðnings þriggja af fimm stjórnarmönnum í starfið. Ekki hefur þó verið gengið til atkvæða um málið.

Ásta hefur nú dregið umsókn sína til baka. Starfsmenn Íbúðalánasjóðs lýstu yfir stuðningi við Ástu með yfirlýsingu eftir að Árni Páll skipaði nefndina.