Komið verði á móts við hópinn

Álfheiður Ingadóttir heilbrigðisráðherra hefur falið lögfræðingum ráðuneytisins að leita leiða til þess að börn með skarð í vör og góm njóti sömu réttinda og börn sem fæðast með annars konar fæðingargalla. Það er að segja að allur kostnaður við aðgerðir sem börnin þurfa að fara í, þar með talinn kostnaður við tannréttingar og tannlækningar, verði þeim að kostnaðarlausu.

Ráðherra segist hafa talið að reglugerðir sem settar voru um áramót og fjalla um endurgreiðslur vegna tannlæknakostnaðar barnanna myndu rétta hlut hópsins. Það virðist sem svo sé ekki.

Álfheiður segir að komið verði til móts við hópinn sem taldi ellefu börn árið 2009 með breytingu á reglugerð eða lögum. „Það gengur ekki að þessi hluti meðferðarinnar sé að kollsigla efnahag fjölskyldna eins og því miður eru dæmi um," segir ráðherra sem séð hefur reikninga upp á fimm milljónir vegna tannréttingakostnaðar barns með skarð í vör og góm. - sbt