Niðurstaða forvals VG staðfest

Niðurstaða forvals VG í Reykjavík, sem kynnt var á dögunum, hefur verið staðfest, eftir að utankjörfundaratkvæði voru endurtalin.

Sóley Tómasdóttir er í efsta sæti fyrir borgarstjórnarkosningar með 439 atkvæði, en Þorleifur Gunnlaugsson fékk 395.

Sóley hlaut 46 bréflögð atkvæði í fyrsta sæti en Þorleifur tíu. Séu öll slík atkvæði dregin frá munar átta atkvæðum á efstu sætunum. Sóley er þá með 393 atkvæði en Þorleifur 385.

Stjórn VG í Reykjavík vill í tilkynningu í gær árétta að frambjóðendur og forvalsstjórn hafi farið að samþykktum reglum um framkvæmd forvalsins.

Áður hafði stjórnin þó lýst því yfir að frambjóðendur hefðu fengið misvísandi upplýsingar og því unnið í góðri trú, en þeir fóru eftir mismunandi reglum.

Samkvæmt reglunum áttu félagar í VG kost á að fá atkvæðaseðil sendan í tölvupósti og skila honum í löturpósti.

Sumir frambjóðendur og stuðningsmenn þeirra fóru hins vegar heim til félagsmanna og skiluðu atkvæðaseðli fyrir þá.

Þorleifur Gunnlaugsson kærði kosninguna. Síðan mátti kjörstjórn víkja og nefnd var skipuð til að fara yfir aðferðafræði VG, þar á meðal forvalsreglur. - kóþ