Allt flug Icelandair gæti stöðvast

Allt flug Icelandair til og frá landinu stöðvast eftir þrjátíu og sex klukkustundir náist ekki samningar milli flugvirkja og viðsemjenda þeirra. Verkfall hefði ekki áhrif á starfsemi Iceland Express þar sem flugvirkjar þess félags eru á verktakasamningum.

Sáttafundur í deilu flugvirkja og viðsemjenda þeirra hefst hjá ríkissáttasemjara klukkan fjögur í dag. Náist ekki samningar fyrir miðnætti á morgun hefst verkfall um 160 flugvirkja sem starfa hjá Icelandair og þar með stöðvast allt flug á vegum félagsins.

Verkfall flugvirkja hjá Atlanta hefst hins vegar á miðnætti í kvöld verði ekki samið fyrir þann tíma, en það hefði ekki strax áhrif þar sem það nær eingöngu til flugvirkja félagsins með starfsstöð á Íslandi. En þeir sinna aðallega skipulagi viðhalds og pappírsvinnu ýmis konar sem því tengist.

Síðustu kjarasamingar flugvirkja voru gerðir í maí 2008. Í upphafi viðræðna nú gerðu þeir kröfu um 25 prósenta launahækkun sem þeir miða við þróun verðlags frá því síðustu samningar voru gerðir. Samkvæmt heimildum fréttastofunnar hafa þeir hins vegar dregið verulega úr kröfum sínum og eftir því sem fréttastofa kemst næst er launahækkunarkrafan komin undir 20 prósent.

Upphaflega var stefnt að kjarasamningi til nokkurra mánaða að ósk Icelandair en nú er verið að ræða kjarasamning til eins árs samkvæmt heimildum fréttastofunnar.

Flugvirkjar hafa ekki farið í verkfall í um 30 ár. En ef til þess kemur hefði það engin áhrif á starfsemi Iceland Express, þar sem flugvirkjar þess félags hafa ekki boðað til verkfalls og heldur ekki flugvirkjar hjá Bláfugli.